کرێکاران، خەڵکی ئازادیخواز و هاوچارەنوسان!

ئەگەر بورژوازی و دەسەڵاتدارانی، هەوڵ ئەدەن ئێمە بە هۆی ناوچە، نەتەوە و قەوم و زمان و کەلتور بناسێنن و لێکمان دابڕێنن، ئەگەر هەوڵیان داوە لە نێوان ئێمەدا سنور بکێشن و تەنانەت هەوڵ ئەدەن ئێمە بە گژ یەک دا بکەن، بەڵام ئێمەی کرێکار و خەڵکی ئازادیخواز، لە هەر کوێی ئەم جیهانەدا بین، چارەنوسی هاوبەش و بەرژەوەندی هاوبەشمان هەیە. ئەم هاوچارەنوسیە لە ماوەی یەک دەیەی ڕابردودا، سەرەڕای ڕەوتی مێژویی، بەڵام بە کردەوە و بە ئاشکرا مانایەکی حاشا هەڵنەگری پەیدا کردوە.

ڕۆژهەڵاتی ناوەراست و بەتایبەت وڵاتانی عێراق، لوبنان و ئەفغانستان لە ماوەی دەیەکانی ڕابردودا، شوێنی تێک هەڵچون و شەڕ لە نێوان زل هێزە جیهانیەکان و حکومەتە دواکەوتوەکان، گروپ و تاقمی قەومی، مەزهەبی و تێرۆریست گەلێک وەک تالیبان، حیزبوڵا، حەشدی شەعبی و دار و دەستەکانیان بوە.

 بۆ دەسەڵاتدارنی ئامریکا و وڵاتانی عەرەبی و هەروەها بۆ ئیرتیجاعی ناوخۆیی وەک ئێران، عەرەبستانی سعودی، ئیمارات، ئەفغانستان، تورکیە و ...، ڕۆژهەڵاتی ناوەراست بەردەوام شوێنی ڕمبازێن و کێ بڕ کێ، مڵهوڕی، نەسڵ کوژی و تاقیکردنەوەی چەکی کۆمەڵ کوژ بوە.

چواردەیە شەڕ لە ئەفغانستان و یاری دەسەڵات لە نێوان هێزە نێونەتەوییە جیهانیەکان و هاوپەیمانە ناوچەییەکانیان لەم وڵاتە و شەڕ و کێ بڕ کێی بەردەوام لە نێوان ئەم هێزانە، لەمپەرێک بوو لە سەر ڕێگای پێشڕەوی بزوتنەوە کۆمەڵایەتیەکان و هەر بۆیە بە کردەوە چارەنوسی خەڵک و بەتایبەت ژنان لەم وڵاتە بە شێوەیەکی دڵ تەزێن ، بو بە پاشکۆی کێ بڕ کێی شەڕی سارد لەم ناوچە، به جۆرێک ئەوەی کە ئەوڕۆ لە ئەفغانستان لە ئارادایە، وەک میدالیای ناوەڕۆکی ڕاستەقینەی ئیرتجاعی کاپیتالیستیە کە بە سەر سینگی مڕۆڤایەتیەوە ماوەتەوە.

دەوڵەتە یەک لە دوای یەکەکان لە ئامریکا و هاوپەیمانەکانی، پاش جینایەتی بێ ئەژمار لە ئەفغانستان و هێنانە سەر کاری دەولەتی موزائیکی و سەپاندنی دەسەڵاتی "کەرزای" و هێزە دواکەوتوەکانی دیکە، جارێکی تر لە موعامەڵەیەکی قیزەون و دژە ئینسانی دا، کۆمەڵگای داڕماوی ئەفغانستانیان پێشکەش بە ڕەوتی تیرۆریست و دروسکراوی دەستی خۆیان یانی تالیبان کرد. ئەم پڕۆسە ماڵ وێرانکەرە چەندین دەیەیە کە ئەفغانستانی کردوتە جەهەندمێک کە ژیان تێیدا مویەسەر نیە.

لە لوبنان، زل هێزە جیهانیەکان بە پێی سناریۆی "ڕۆژهەڵاتی ناوەراستی قەومی – مەزهەبی" ساڵانێکی زۆرە کە دەوڵەتی موزائیکی (سەپێندراو) و گەندەڵ کە پێکهاتون لە دواکەوتوترین هێزە مەزهەبیەکان، بە سەر خەڵکی ئەو وڵاتەدا سەپاندوە. هەر بۆیە بە کردەوە لوبنان بوەتە مەیدانی ڕمبازێنی دەوڵەت، هێز و تاقمە تیروریستیەکانی وەک حیزبوڵا، فاڵانژەکان و گروپە دەسی ڕاسیە مەسیحیەکان، کە لە ژێر ناوی پاراستنی خەڵکی "شێعە"، "سوننە" و "مەسیحی" ئەم کۆمەڵگایان توشی ڕۆژ ڕەشی کردوە.

دەوڵەت و هێزگەلێک کە هۆکاری سەرەکی نائەمنی کۆمەڵگان، یاری کردن بە ژیانی خەڵکی لوبنان و یەکێ لە پایە سەرەکیەکانی شەڕی ناوخۆ، تیرور و تۆقاندنی خەڵک لەم وڵاتە بوە.

لە عێراق، هێرش و لەشکر کێشی ئامریکا و هاوپەیمانەکانی بۆ سەر ئەم وڵاتە، بو بەهۆی وێرانی ژێرخانی ئابوری و کوشتاری بە کۆمەڵ و ماڵ وێرانی دەیان میلیون کەس و هەروەها چارەنوسی ئەم وڵاتە دراوەتە دەستی گروپە قەومی، مەزهەبی و عەشایری دواکەوتوی شێعە و سوننە و کوردایەتی. دابەش کردن دەسەڵات بە پێی ئەم وشە کۆن و داڕزیوانە، شەڕ و کێشەی قەومی – مەزهەبی، بە کردەوە هەژاری، برسیەتی، ئاوارەیی، ڕۆژ ڕەشی و بێ مافی هەوسار پچراوی بە سەر کۆمەڵگای پێشکەوتی عێراقدا سەپاندوە.

 لەشەڕی کەنداوە کە بوە هۆی داڕمان و لێک هەڵوەشاندنەوەی بنەمای کۆمەڵگا و دروست کردنی "باتڵاقێک" بە ناوی عێراق، دۆڕاوی سەرەکی لە پلەی یەکەم ئامریکا و هاوپەیمانەکانی بوون و براوەی ئەم شەڕە، ئیرتجاعی ئیسلامی دەسەڵاتدار لە ئێران، هێزە ناسیونالیستەکان و سەرجەم باندە قەومی و مەزهەبیەکان بوون. بەڵام ئەمە تەنیا بەشێک لە ڕاستیەکانە، ڕوخسارێکی تر جیهانێکە کە لە لوبنان و عێراق و ئەفغانستانەوە تا ئامریکا، ئەوروپا و ئاسیا و ... کە زۆر لە مێژە هاوار دەکا و دەڵێت" ئیتر بەسە"

 لە بەرانبەر ئەم وەحشی گەریە و ئەم زۆرەملی و قتڵ و عام و وێرانگەریە لە وڵاتانی عێراق، لوبنان و ئەفغانستان، کۆمەڵگای جیهانی شایەتی خۆڕاگری، ناڕەزایەتی و بزوتنەوەی کۆمەڵایەتی بەشمەینەتانی کۆمەڵگای ئێمە و ئێوە و دەیان و دەیان وڵاتی ترە. خەباتێکی هاوبەش لە دژی کۆنەپەرەستی قەومی و مەزهەبی، بۆ بنیات نانی کۆمەڵگایەکی سکولار، ئازاد و بەرابەر، بۆ بژیوی ژیان و کەرامەتی ئینسانی، بۆ نەهێشتنی هەڵاواردن و گەندەڵی، بۆ ڕۆژهەڵاتی ناوەراستێکی بەری لە قەوم پەرەستی و مەزهەبی، ئەوڕۆ لە ئارادایە. خەباتێک کە لە تارانەوە تا بەیروت و بەغدا و کابولی داگرتوە.

ناڕەزایەتیە جەماوەریەکان و خۆپیشاندانی بەرچاوی کۆمەڵایەتی لە شارە گەورە و بچوکەکانی عێراق، لوبنان ئەفغانستان و ئێران لە دژی دەوڵەتانی دواکەوتوو و گەندەڵ، لە دژی باندە دەستکردە قەومی و مەزهەبیەکان، بەشێکە لەم خەباتە هاوبەشە.

ناڕەزایەتیە کۆمەڵایەتیەکانێک کە نەک هەر لە دژی دەسەڵاتە دواکەوتوەکان، بەڵکو لە دژی پەرەدان بە ڕق و کینەی قەومی، میللی و مەزهەبی لە لایەن هێزە ناسیونالیست و مەزهەبیەکانەوە و بە شەکاندنەوەی ئاڵای هاوچارەنوسی  میلیون ها کەس لەم ناوچەدا هاتوەتە مەیدان.

زل هێزە جیهانیەکان و دەوڵەتە دواکەوتوەکانی ناچەکە، لە ئێرانەوە تا عەربستانی سەعودی و ئیسرائیل، هەوڵ ئەدەن لە نەهامەتیەکانی خەڵک، بۆ بەهێز کردنی خۆیان و باندە دەستکردەکانی خۆیان کەڵک وەر بگرن و بەڵام سەرەڕای دروسکردنی باندی قەومی و مەزهەبی و پەرەدان بە شەڕ و وێرانی، نەهێشتنی ئاسایش و ئەمنیەتی خەڵک، نەیان توانیوە درز بخەنە نێوان ئەم یەکیەتی و یەک ریزیە، ئەم هاوچارەنوسیە و ئەم خەباتە هاوبەشەدا.

ئەوڕۆ لە ڕوانگەی ئێمەی کرێکار و خەڵکی ئازادیخوازەوە لەم وڵاتانە،  سەرجەم ئەم هێزانە، لە ئامریکاوە و تاقمە دروسکراوەکانیەوە و هاوپەیمانی ناوچەیی خۆی لەوانە ئیسرائیلەوە بگرە تا کۆماری ئیسلامی و گروپە تیروریستیەکانی دەسکردی، هەتا و ..... سەرجەم ئەمانە ئیرتجاعی ریز بەستون کە ئاسایش، ئەمنیەت و ئازادی ئێمەیان بە بارمتە گرتوە. ئەم ئیرتجاعە یەکەم لەمپەری سەر رێگای ئێمەیە بۆ گەیشتن بە ئاسایش، یەکسانی و ژیانێکی بەختەوەرە.

حیزبی ئێمە، کرێکاران و خەڵکی ئازادیخواز لە ئێران، لە خەباتی خۆی بۆ ڕزگاری لە چنگ نەهامەتی کۆماری ئیسلامی لە بەرامبەر سەرجەم سیاسەتە ئیرتجاعیەکانی کۆماری ئیسلامی لە مەڕ پەرەدان بە ڕق و کینەی قەومی و مەزهەبی و لە کەڵک وەرگرتن لە بێ مافی پەنابەرە ئەفغانستانیەکان و هەناردنیان بۆ شەڕ، دەوەستێین.

شان بە شانی خەڵک و چینی کرێکاری عێراق لە دژی تاقمە دەستکردەکانی کۆماری ئیسلامی، دەستێوەردانەکانی تورکیە و ئامریکا و هێزەکانی ناوچەکە وەستاوین و بۆ بەهێز کردنی ئەم خەباتە هەوڵ ئەدەین. شان بە شانی قوربانیەکانی جینایەتی ئامریکا و هاوپەیمانەکانی لە ئەفغانستان، شان بە شانی میلیون ها پەنابەری ئەفغانستانی لە ئێران و لە دژی هەڵاواردن و ئاپارتاید، دەوەستین.

بزوتنەوەی یەکسانیخوازی ژنان لە ئێران،  خۆی بە هاوچارەنوسی و هاو ئێش و ئازاری ژنان و کچانی لاوی ئەفغانستان لە دژ ڕەوتی مەزهەبی و تیرۆریستی تالیبانی دژە ژن، دەزانێت. بزوتنەوەی یەکسانی خوازی ژنان لە ئێران و ئەفغانستان، یک بزوتنەوەن بۆ ئامانجێکی هاوبەش یانی یەکسانی و بەرابەری تەواوی ژن و پیاو، بۆ لە گۆڕنانی یاسای شەریعەتی ئیسلامی و کۆنەپەرستی دژ بە ژن.

سەرەڕای ئەوانەش، ناڕەزایەتیەکانی خەڵکی زەحمەتێکش بۆ ئاسایش و ئازادی، ناڕەزایەتی لاوان لە لوبناوە تا عێراق و ئێران بۆ بنیات نانی کۆمەڵگایەکی ئینسانی و یەکسان، سەرجەم سنورەکانی میللی، ناسیونالیستی و ئیرتجاعی بەزاندوە و سنورەکانی بێ مانا کردەوە.

 ئێمە و خەڵکی جیهان، پەیامی هاوپشتی و هاوچارەنوسی خەڵکی لوبنان بۆ زەحمەتکێشان و بێ بەشانی ناوچەکە کە لە سرودە شۆرشگێرانەکانیان لە خۆپیشاندانی بەرچاوی جەماوەری لە بەیروت ڕەنگی دایەوە، بە گوێمان گەیشت. بیستمان کە دەیان وت: (لە لوبناوە تا ئێران، لە لوبناوە تا عێراق، یەک شۆرشە لە دژی دزان و گەندەڵان" و " شۆڕش لە سەرجم وڵاتان" ،"ثوره فی کل الدول!" ) و ڕای دەگەیێنین کە خۆمان بە بەشێک لەم خەباتە هاوبەشەی کرێکاران و زەحمەتکێشان و بزوتنەوە کۆمەڵایەتیەکانی ناچەکە دەزانین.!

ئێمە ئەو ڕاستیە باش دەزانین کە پێشڕەوی هەرکام لەم بزوتنەوانە، پێشڕەوەی ئەوەی دیکە ئاسان و لەبار دەکات و سەرکەوتنی  خەباتی ئازادیخوازی و یەکسانی خوازی و بزوتنەوەی ڕۆژهەڵاتێکی بە دوور لە قەوم پەرەستی و بە دوور لە مەزهەب، ڕۆژهەڵاتێکی ئازاد و بەختەوەر و بەرابەر دابین دەکات.

هەر بۆیە سەرکەوتنی بزوتنەوەی کرێکاران و خەڵکی بەش خوراو و ئازادیخواز لە ئێران لە دژی کۆماری ئیسلامی بۆ ڕوخاندنی ئەم ڕژیمە، بێ گومان کاریگەری قوولی لە سەر خەباتی ئێوە و لاواز کردنی کۆنەپەرەستی و ئیرتجاع لە وڵاتانی ئێوەیش دەبێت و هەروەها بزوتنەوەی ڕزگاری لە چنگ نەهامەتی تالیبان لە ئەفغانستان و ڕزگار بوون لە هەژاری و ئیرتجاعی قەومی  و مەزهەبی لە لوبنان و عێراق، خەباتی ئێمە لە ئێران و لە دژی ئیرتجاعی دەسەڵات دار، ئاسان دەکات و ڕێگای پێشڕەوی و سەرکەوتنی ئێمەش خۆشتر دەکات.

 

کونگرەی دەیەمی حیزبی حیکمەتیست (خەتی ڕەسمی) سڵاو دەنێرێ بۆ ئێوە کرێکاران و خەڵکی ئازادیخواز و ڕای دەگەینێت؛ هەمو تین و توانای خۆمان دەخەینە گڕ بۆ سەرکەوتنی چینی کرێکار و خەڵکی ئازادیخواز لە ئەفغانستان، لوبنان، عێراق و ئێران، لە دژی دسەڵاتدارانی کۆنەپەرەست و گروپە قەومی و مەزهەبیکان، لە دژی هەژاری و ڕۆژ ڕەشی یەک کە بە سەر خەڵک دا سەپاندویانە و هەروەها بۆ ژیانێکی شیاوی ئینسان هەوڵ ئەدەین.

 

 بژی هاوپشتی خەباتی چینی کرێکار و خەڵکی ئازادیخواز و یەکسانی خوازی ناۆچەکە

بژی ئازادی و بەرابەری

کونگرەی دەیەمی حیزبی حیکمەتیست (خەتی ڕەسمی)

خاکەلێوەی ۱٤۰۱ – مارسی ۲۰۲۲